நடிகர் அமிதாப் பச்சன் படப்பிடிப்பில் ஏற்பட்ட விபத்தில் சிக்கி பலத்த காயம் ஏற்பட்டுள்ள சம்பவம் பெரும் பரபரப்பை ஏற்படுத்தியுள்ளது.
பாலிவுட் திரையுலகில் பிக் பி என அழைக்கப்படுபவர் நடிகர் அமிதாப் பச்சன். இதுவரை நூற்றுக்கணக்கான படங்களில் நடித்துள்ளார் அமிதாப் பச்சன். தற்போது தெலுங்கில் பிரபாஸ் நடிப்பில் உருவாகும் Project K என்ற திரைப்படத்தில் நடித்து வருகிறார். இப்படத்தின் படப்பிடிப்பு ஹைத்ராபாத்தில் நடைபெற்று வருகிறது. இந்தப் படப்பிடிப்பில் பங்கேற்றிருந்தார் நடிகர் அமிதாப் பச்சன்.
இதில் சண்டை காட்சி ஒன்று படமாக்கப்பட்டு வந்தாக தெரிகிறது. அப்போது எதிர்பாராத விதமாக விபத்து ஏற்பட்டுள்ளது. இதில் நடிகர் அமிதாப்புக்கு வலது இடுப்பு பகுதியில் காயம் ஏற்பட்டுள்ளதாக தகவல் வெளியாகியுள்ளது. வலது விலா எலும்பு முறிவு ஏற்பட்டு தசை பகுதியும் கிழிந்ததாக கூறப்படுகிறது.
இதனால், படப்பிடிப்பு உடனடியாக ரத்து செய்யப்பட்டு ஹைத்ராபாத்தில் உள்ள தனியார் மருத்துவமனையில் நடிகர் அமிதாப் பச்சன் அனுமதிக்கப்பட்டுள்ளார். அவருக்கு சி.டி. ஸ்கேன் செய்த மருத்துவர்கள் அவர் ஓய்வெடுக்க வேண்டும் என அறிவுறுத்தியுள்ளனர்.
இதையடுத்து மும்பை திரும்பிய நடிகர் அமிதாப் பச்சன் தனது வீட்டில் ஓய்வு எடுத்து வருகிறார். தனக்கு விபத்து ஏற்பட்ட தகவலை நடிகர் அமிதாப் பச்சனே தனது சமூக வலைதள பக்கத்தில் தெரிவித்துள்ளார். அதில் தனக்கு மூச்சு விடும்போதும், நடந்து செல்லும்போதும் வலி ஏற்படுவதாகவும் கூறியுள்ளார் அமிதாப் பச்சன்.
இதனால், இயல்பு நிலைக்கு திரும்ப சில வாரங்கள் ஆகலாம் என்றும் வலிக்கான மருந்துகளை எடுத்து வருவதாகவும் தெரிவித்து உள்ளார். ரசிகர்கள் யாரும் தன்னை பார்க்க வரவேண்டாம் என்றும் அமிதாப் பச்சன் கேட்டுக் கொண்டுள்ளார். அமிதாப் பச்சன் விபத்தில் சிக்கி எலும்பு முறிவால் பாதிக்கப்பட்டுள்ள தகவலை கேட்ட ரசிகர்கள் அதிர்ச்சி அடைந்துள்ளனர்.
அவர் விரைவில் பூரண நலம் பெற வேண்டும் என சமூக வலைதள பக்கங்களில் தங்களின் பிரார்த்தனையை வெளிப்படுத்து வருகின்றனர் நெட்டிசன்கள். இதேபோல் பாலிவுட் பிரபலங்கள் பலரும் அமிதாப் பச்சன் விரைவில் குணமடைய வேண்டும் என வாழ்த்து கூறி வருகின்றனர். Project K திரைப்படம் தெலுங்கு மட்டுமல்லாமல் தமிழ், ஹிந்தி, கன்னடம், மலையாளம் ஆகிய மொழிகளில் பேன் இந்தியா படமாக உருவாகிறது.
What’s your Reaction?
+1
+1
+1
+1
+1
+1
+1
