Bigg Boss Tamil 7: நேற்று நடந்த சுவாரஸ்யம் :`அந்தப் பேரோட ஜெயிப்பேன்’ – ஜோவிகாவின் உறுதி

‘ஜெஸ்ஸி.. உனக்கு கொசு கடிச்சா எனக்கு கடிச்ச மாதிரி. ஜாக்கிரதையா இரு. நிம்மதியா தூங்கு’ என்று பூர்ணிமாவுடன் ரொமான்ஸ் செய்ய முயன்று கொண்டிருந்தார் சுரேஷ். ஆனால் பூர்ணிமா புத்திசாலி. ‘அண்ணா’ என்று அவரை அழைத்து விட்டு ‘இந்த மணி – ரவீனா முன்னாடி மட்டும் என்னைக் கலாய்க்காதீங்க. அவங்க சிரிக்கறதைப் பார்த்தாலே எனக்கு காண்டாவுது’ என்றார். இது இன்னொருவிதமான புகை.

‘இங்க வந்து பேசும் போது மாயா நல்லாத்தான் பேசறா… அந்தப் பக்கம் போனவுடனே ஆளே மாறிடறா’ என்று மணியிடம் சிணுங்கிக் கொண்டிருந்தார் ரவீனா. ‘உனக்குப் பிடிக்கலையா.. சைலண்ட்டா எழுந்து வந்துடு. அவ்வளவுதான் சொல்வேன்’ என்று இன்னொரு கேட்டை சாத்திக் கொண்டிருந்தார் மணி.

நாள் 16 விடிந்தது. ‘வேக் அப்’ பாடல் காட்சியைக் காணவில்லை. எம்பி3 பிளேயர் ரிப்பேர் போலிருக்கிறது. `ஒருத்தனை தூக்கி அடிச்சு அப்படியே சுவத்துல நிறுத்தற மாதிரி கனவு வந்தது’ என்று மணியிடம் சொல்லிக் கொண்டிருந்தார் நிக்சன். அந்த ‘ஒருத்தன்’ மணிதானோ?!

வீட்டின் நிகழ்வுகளை வைத்து ஒவ்வொருவருக்கும் ‘ராசி பலன்’ சொல்ல வேண்டும் என்று சுரேஷிற்கு டாஸ்க் தந்தார் பிக் பாஸ். ஜோசியர் மாதிரியான ‘லுக்’கை சிரமப்பட்டு உருவாக்கிக்கொண்டு சபையில் வந்து நின்றார். `பெரிய வீட்டாருக்கு மட்டும்தான் இந்த ஆரூடம். எனவே எதிர் வீட்டிற்கு வணக்கம் இல்லை’ என்று ஆரம்பத்திலேயே கலகலக்க வைத்தார் சுரேஷ். பிறகு ஒவ்வொருவரைப் பற்றியும் அவர் நேரடியாகவும் மறைமுகமாகவும் வைத்த நகைச்சுவைக் குத்தல்கள் அருமை. ஆனால் வழக்கம் போல சில கமென்ட்டுகள் எல்லை மீறியிருந்தன.

‘விசித்ராம்மாவிற்கு மீன ராசி. சென்சார் பண்ணாலும் பரவாயில்லை.. இதைச் சொல்லிடறேன். அது மீன ராசியில்ல.. ‘யான ராசி’ என்று சுரேஷ் சொன்னது நிச்சயம் ரசிக்கத்தக்க நகைச்சுவை இல்லை. விசித்ரா இதை இயல்பாக எடுத்துக் கொண்டாலும் மாயா உடனே ஆட்சேபித்தது நன்று. தூரத்தில் நின்று கொண்டிருந்த மாயா, சந்திரமுகியின் ஆவி உள்ளே புகுந்ததைப் போன்று சுரேஷையே வெறிக்கப் பார்த்துக் கொண்டிருந்த காட்சி நமக்கே சற்று திகிலை ஏற்படுத்தியது என்றால், சுரேஷிற்கு சொல்ல வேண்டுமா? ‘அய்யோ.. பார்க்கறானே.. பார்க்கறானே’ என்று பம்மி பம்மியே பல விஷயங்களை சொல்ல முடியாமல் தத்தளித்தார். பிறகு ‘கட்டத்துரைக்கு கட்டம் சரியில்ல. இத்தோட நிறுத்திக்கறேன்’ என்று முடித்துக் கொண்டார்.

எந்தவகையிலும் உருவக்கேலி தவறானது

ஒவ்வொருவரையும் பற்றி சுரேஷ் விவரித்த ‘ராசி பலன்’ காமெடிக்கு பெரிய வீடு விழுந்து விழுந்து சிரித்தது. அதிலும் ரவீனாவெல்லாம் கேட்கவே வேண்டாம். ‘இன்றைக்கு புதன்கிழமை’ என்று சும்மா சொன்னாலே சிரிப்பார். இப்போதோ சுரேஷின் சுமாரான காமெடிக்கு உருண்டு புரண்டு சிரித்துக் கொண்டிருந்தார். தான் எங்கே சறுக்குகிறோம், எல்லை மீறுகிறோம் என்பது சுரேஷிற்கே நன்றாகத் தெரிகிறது. ஆனால் ஒரு மாதிரியாக சமாளித்து எஸ்கேப் ஆகி விடுகிறார். விசித்ரா குறித்த உருவக்கேலிக்கு மாயா உள்ளிட்ட பலரும் ஆட்சேபம் தெரிவித்ததால் விசித்ராவின் காலில் சாஷ்டாங்கமாக விழுந்து மன்னிப்பு கேட்டார் சுரேஷ். அதையும் வீடு காமெடியாகவே எடுத்துக் கொண்டது. ‘ஜோக்காக எதையாவது பேச வேண்டும்’ என்று உந்துதல் காரணமாகவே சுரேஷ் அப்படிச் செய்கிறார் என்பதை வீடு புரிந்து கொண்டிருப்பதால் இதைப் பிரச்சினையாக மாற்றுவதில்லை.

தன் மீது செய்யப்பட்ட கேலிக்கு உடனே ஆட்சேபம் தெரிவித்த மாயாவிற்கு நன்றி சொன்னார் விசித்ரா. ‘இந்த மாதிரி விமர்சனம், கமென்ட்ஸ் எல்லாம் நடிச்ச காலத்துலயே நான் நிறைய பார்த்துட்டேன். ஆனா இது தப்பா போயிடக்கூடாதில்லையா?’ என்று பின்னர் யுகேந்திரனிடம் விசித்ரா சொல்லிக் கொண்டிருந்ததில் அவரது உள்ளார்ந்த வலி புரிந்தது. `சுரேஷோட காமெடி பல சமயங்கள்ல எனக்கு எரிச்சலூட்டுது. பாத்ரூம் போறதை வெச்சுல்லாமா காமெடி பண்ணுவாங்க?’ என்று பூர்ணிமாவிடம் தன் ஆட்சேபத்தை புலம்பிக் கொண்டிருந்தார் மாயா.

தனியாக சென்று கண்கலங்கிக் கொண்டிருந்த மாயாவிற்கு ஆறுதல் சொன்னார் விஷ்ணு. ‘ச்சே.. ச்சே. நான் இந்த கேமை நினைச்சுல்லாம் அழலை. வீட்டு ஞாபகம் வந்துடுச்சு. நான் கடந்து வந்த பாதை கண்ணு முன்னாடி ஓடுச்சு’ என்று சமாளித்தார் மாயா. ‘வீட்ல இருக்கறவங்க ஒவ்வொருத்தர பத்தியும் புட்டு புட்டு வெச்சாருல்ல மனுசன்?!’ என்று சுரேஷின் ராசிபலன் காமெடியை வியந்து கொண்டிருந்தார் மணி. `ஒரு நல்ல காமெடியன் தன்னைத்தான் தாழ்த்திப்பான். மத்தவங்களை சிரிக்க வைப்பான். சுரேஷ் சொல்றதுல்லாம் காமெடி இல்ல. அட்டாக்’ என்று மாயாவின் புலம்பல் தொடர்ந்தாலும் அது உண்மை. மற்றவர்களின் உருவத்தை மலினப்படுத்தியும் எட்டி உதைத்தும் செய்யும் கவுண்டமணியின் காமெடியை விடவும் தன்னையே ‘கைப்புள்ள’யாக இறக்கிக் கொண்டு வடிவேலு செய்யும் காமெடிகள் பல படிகள் உயரத்தில் இருக்கும்.

பிக் பாஸ் வீட்டில் காதலைப் போலவே கத்தரிக்காயும் குழப்பமான திசையில் இருக்கிறது. பூர்ணிமா வைத்த கத்தரிக்காய் குழம்பு குறித்து அவருக்கே உள்ளுக்குள் கலவரம் ஏற்பட்டு மாயாவை பரிசோதனைக்கு அழைத்தார். `ஏதோவொரு சாப்பிடற பொருள் மாதிரிதான் தெரியுது. குழம்பு வெச்சு பெரிய வீட்டை அட்டாக் பண்றியா.. வெரிகுட்.. வெரிகுட்’ என்று அகம் மகிழ்ந்தார் மாயா. ஆனால் பூர்ணிமா பயந்ததற்கு எதிர்மாறான விளைவு நிகழ்ந்தது. ‘குழம்பு செமயா இருக்கு’ என்று பெரிய வீட்டார் ஏகமனதாக சப்புக் கொட்டி பாராட்ட, ‘இதையெல்லாம் அனுபவிக்கறதா.. வேண்டாமா’ என்கிற திகைப்பில் இருந்தார் பூர்ணிமா.

கதை நேரம் முடிந்ததும் அதைப் பற்றிய குறுக்கு விசாரணையை சின்ன வீட்டார் செய்தார்கள். `அவ்வளவு கஷ்டப்பட்டும் ஏன் அந்த கடைசிப் பெயரை வெச்சுக்கணும்னு நெனக்கறீங்க?’ என்று ஜோவிகாவிடம் பிரதீப் கேட்ட கேள்வி சரியானது. `அந்தப் பெயர்லதான் ஆரம்பிச்சேன். அந்தப் பெயரோடதான் கடைசி வரைக்கும் சாதிக்கணும்னு நெனக்கறேன்’ என்று போராட்டக் குணத்தோடு ஜோவிகா சொன்ன விளக்கமும் நன்று. நம்மை அவமானப்படுத்தியவர்களின் முன்னால் நன்றாக வாழ்ந்து காட்ட வேண்டும் என்கிற வைராக்கிய உணர்வே நம்மை முன்னேற வைக்கும்.

அடுத்த கேள்வியை சுரேஷிடம் கேட்டார் பிரதீப். ‘அம்மா.. மனைவி.. ரெண்டு உறவையும் பேலன்ஸ் பண்ண கஷ்டமா இருக்குன்னு சொன்னீங்களே?’ என்ற கேள்விக்கு ‘வீட்டுக்கு வருகிற மருமகள் ‘இதுவும் நம்ம வீடுதான்’ன்ற உணர்வோட செயல்படணும். கணவரும் நிறைய விட்டுத் தரணும். அதே மாதிரி தன்னோட வீடு, சொந்த பந்தங்களை விட்டு வரும் மருமகளுக்கு புகுந்த வீடு நிறைய ஆதரவு தரணும். என்னோட மனைவி அவங்க சொந்தக்காரங்களுக்கு போன் பண்ணி பேசக்கூட பயப்படுவாங்க. எதுனா பிரச்சினையாயிடுமோன்னு.. என் மனைவி, மாமனார் எனக்கு கிடைச்ச பாக்கியம்’ என்று நெகிழ்ந்து கண்கலங்கினார் சுரேஷ்.

`நடிப்பு ஆசைக்காக உன் ஃபேமிலியை கன்வின்ஸ் பண்றது ஈஸியா இருந்துதா?’ என்ற கேள்வியை அக்ஷயாவிடம் கேட்டார் பூர்ணிமா. `ஆரம்பத்துல கஷ்டமா இருந்தது. நெறைய சண்டை போட்டிருக்கேன். ஆக்டிங் ஃபீல்டுல மரியாதையே இருக்காது. என்னை மாதிரி எந்தவொரு பேக்கிரவுண்டும் இல்லாம வர்றவங்களுக்கு மரியாதையே தர மாட்டாங்க. நடிக்கற இடத்துல எங்க அம்மாவிற்கு கூட மரியாதை கிடைக்காது. யாரா இருந்தாலும் மரியாதை குடுங்க. அவங்களும் ஒரு நாளைக்கு பெரிய ஆளா வருவாங்க’ என்று அக்ஷயா தந்த விளக்கத்தை வீடு கைத்தட்டி ஏற்றது.