உடல் பருமன்: “குண்டா… கொழு கொழுனு இருக்கான் எம் புள்ள… அவனுக்கு என்னக் குறைச்சல்…” என்று சென்ற தலைமுறையில் வினா எழுப்பிய பெற்றோர்கள், இப்போது குண்டாகவும், கொழு கொழுவென்றும் அதிக எடையில் இருப்பது ஆபத்து என்பதை புரிந்துகொள்ளத் தொடங்கியிருக்கின்றனர்.
உடற்பருமன் குறித்த நுணுக்கமான விஷயங்களைத் தெரிந்துகொள்வது முக்கியமானது.
சுமார் இருபது வருடங்களுக்கு முன்பு உயரத்திற்கேற்ற எடையைப் பராமரிக்காமல், அதிக உடல் எடையோடு இருந்தவர்களின் எண்ணிக்கை மிக மிகக் குறைவு. ஆனால் இன்றோ அதிக உடல் எடையால் அவதிப்படுபவர்களின் எண்ணிக்கை பல மடங்கு அதிகரித்திருக்கிறது. அதனாலேயே உலக உடல் பருமன் தினம் விழிப்புணர்வு கொண்டாடப்பட வேண்டிய அவசியத்தில் இருக்கிறோம் என்கிறார்கள் சித்த மருத்துவ நிபுணர்கள்.
உடல் பருமன் என்பது நோயா?
‘உடல்பருமன்…’ சென்ற நூற்றாண்டில் அழகியல் நோக்கோடு பார்க்கப்பட்ட கருத்தியல், இந்த நூற்றாண்டில் நோயியல் நோக்கோடு பார்க்கப்பட்டதில் பெரும் ஆறுதல்!
அதிக உடல் எடையைத் தொடர்ந்து சரடாய் நீளும் துணை நோய்களை சமாளிப்பது தான் இப்போதைய மருத்துவ உலகத்திற்கு பெரும் சவால். ஒரு பள்ளியை எடுத்துக்கொண்டால், மொத்த பள்ளிக்கும் சேர்த்தே ஒன்றல்லது இரண்டு சிறார்கள் தான் கொஞ்சம் கூடுதல் உடல் எடையோடு அப்போதெல்லாம் இருப்பார்கள். ஆனால் இன்றைய
நிலைமை தலை கீழ்!
உடல் பருமன் கொண்ட குழந்தைகளின் எண்ணிகை அதிகமா?
ஒவ்வொரு பள்ளிகளிலும் சென்று கவனித்தாலே எத்தனை சிறுவர்கள் கூடுதல் எடையோடு இருக்கிறார்கள் என்பது தெரிய வரும். கூடுதல் உடல் எடையோடு மட்டுமில்லாமல் பல குழந்தைகள் உடற்பருமனோடும் இருக்கிறார்கள்.
அதிகரித்த உடல் எடை, உடல் பருமன் வேறுபாடு
உடல் எடையைப் பொறுத்த வரை இரண்டு விஷயங்களை நாம் புரிந்துகொள்ள வேண்டும். அதிக உடல் எடைக்கும் (overweight), உடற் பருமனுக்கும் (Obesity) கொஞ்சம் வேறுபாடு இருக்கிறது.
-
உயரத்திற்கேற்ற எடையை விட கூடுதல் எடை இருப்பதை அதிக உடல் எடை என்றும், அதையும் மீறி கூடுதல் உடல் எடையால் உடலில் சிக்கல் ஏற்படுவது
-
வேறு தொற்றா நோய்களுக்கு காரணமாக அமைவது
-
அன்றாட பணிகளை இயல்பாக செய்யமுடியாமல் தவிக்கும் சூழல்
-
உடலின் இயங்கியல் பாதிக்கப்படுவது.
போன்றவற்றின் தொகுப்பை ‘உடற்பருமன்’ என்று வகைப்படுத்தலாம்.
அதாவது BMI (Body Mass Index) கணக்கீட்டின்படி, ஒருவரின் BMI இருப்பத்தைந்துக்கு அதிகமாக இருப்பின் அதிக உடல் எடை உள்ளவர், BMI முப்பதுக்கும் அதிகமாக இருப்பின் உடற்பருமன் பிரச்சனையால் அவதிப்படுபவர்
என்று பட்டியலிடுகிறது மருத்துவ அறிவியல்.
ஒருவரது BMI முப்பதையும் தாண்டி, ஐந்து, பத்து என்று அதிகரித்துக்கொண்டே சென்றால் உடற்பருமன் அளவீடு சார்ந்து பல பிரிவுகள் இருக்கின்றன.
உடல் பருமனால் உண்டாகும் பிரச்சனைகள்
-
உடல்பருமன் பலவித உடல் பிரச்சனைகளை உண்டு செய்யலாம்.
-
அதிகுருதி அழுத்தம்,
-
நீரிழிவு நோய்,
-
மாரடைப்பு
-
இரத்தக் குழாய்களில் கொழுப்புப் படிமானம்,
ஒரு சில சமயங்களில் மரணத்திற்கும் காரணமாக இருக்கும்
என்றால் உங்களால் நம்ப முடிகிறதா? வேறு வழி இல்லை, நம்பித்தான் ஆக வேண்டும்.
உடற்பருமனுக்கும் மன அழுத்தத்திற்கும் பெரும் தொடர்பு இருப்பதும் குறிப்படத்தக்கது. ‘Metabolic syndrome’ எனும் தொகுப்பிற்கும், உடற்பருமன் தான் முதல் விதை!
கடந்த இருபது வருடங்களில் மட்டும் உலக அளவில் உடற்பருமன் பிரச்சனையின் எண்ணிக்கை நான்கு மடங்கு அதிகரித்திருக்கிறது.அதிலும் சிறுவர்கள் மற்றும் இளைஞர்களிடம் உடற்பருமன் பிரச்சனை வருடா வருடம் அதிகரித்துக்கொண்டே செல்வது சமுதாயத்துக்குப் பெரும் உளைச்சல்! அதோடு சிறுவயதிலேயே உடற்பருமன் ஏற்படுமாயின் இளவயது மரணங்களின் எண்ணிக்கையும் அசுர வேகம் எடுக்கும்!
உடல் பருமனுக்கு என்ன காரணம்?
முன்பெல்லாம் உடல் எடையைப் பராமரிக்க யாரும் தனி சிரத்தையெல்லாம் எடுத்ததாய் நினைவில்லை. ஆரோக்கியமான உணவு முறையும், வாழ்வோடு இணைந்திருந்த உடல் உழைப்பும் உயரத்திற்கேற்ற எடையைப் பெரும்பாலானோருக்கு கொடுத்திருந்தன.
நலமில்லா உணவு முறைகளும் நலமற்ற வாழ்வியல் முறைகளும் உடற்பருமனுக்கு இப்போதெல்லாம் அடிப்படை காரணங்களாகின்றன.தொலைக்காட்சிப் பெட்டியை அல்லது செல்போனைப் பார்த்துக்கொண்டே சாப்பிடும் போது, எவ்வளவு உணவை எடுத்துக்கொண்டோம் என்பதை அறிவது கடினம். கண்டிப்பாக பசியைமீறி ய உணவையே ஒருவர் எடுத்துக்கொள்வார். காரணம் திரையில் ஒளிபரப்பாகிக்கொண்டிருக்கும் நிகழ்ச்சி சார்ந்தே முழு கவனமும் இருக்குமே தவிர சாப்பிடும் உணவில் இருக்காது! இது குழந்தைகள் முதல் பெரியவர்கள் வரை அனைவருக்குமே இந்த இயல்பு உண்டு.அதிலும் சிலர் என்ன சாப்பிட்டோம் என்று தெரியாமலேயே மெய்மறந்து சாப்பிடுவதும் உண்டு.
சிலர் உடல் எடையைக் குறைக்கிறேன் என்ற பெயரில் காலை உணவைத் தவிர்ப்பார்கள் இடை உணவாக எடுத்துக்கொள்ளும் ஆரோக்கியமற்ற நொறுவைகளில், காலை உணவை விட பல மடங்கு கலோரிகள் நிறைந்திருக்கின்றன என்பது குறிப்பிடத்தக்கது.
மைதா சேர்க்கப்பட்ட பேக்கரி உணவுகளைப் பட்டியிலிட்டு அதன் பாதகங்களை எழுதப் பக்கங்கள் போதாது. அத்தனையும் கலோரி நிறை பாதக உணவுகள். உடல் எடையைக் கூட்டுவதில் வெள்ளைச் சர்க்கரையின் பங்கிற்கு ‘இனிப்பு வில்லன்’ என சிறப்பு விருது அளிக்கலாம். வெள்ளைச் சர்க்கரையின் பயன்பாட்டைக் குறைத்தாலே
படிப்படியாக உடல் எடை குறைவதைப் பார்க்கலாம். ஆனால் வெள்ளைச் சர்க்கரையிடம் கைதாகி நிற்கின்றன நமது நாவின் சுவை மொட்டுகள்.
உயரத்திற்கேற்ற எடையைவிட, எடைமானி அதிக எடையைக் காட்டும் போதே, முன்னெச்சரிக்கை நடவடிக்கையாக உடல் எடையைக் கட்டுப்படுத்துவதற்கான முயற்சிகளை கட்டாயம் மேற்கொள்ள வேண்டும்.
உடல் பருமனாகத்தான் இருக்கிறார்கள் என்பதை கண்டறிவது?
-
தொப்பை முந்திரிக்கொட்டையாய் முன் துருத்தி நிற்பது
-
இடையைச் சுற்றி டயர் அமைப்பில் சதைத் தொகுப்பு உருவாவது
-
நடக்கும் போது உள் தொடைகள் உரசிக்கொள்வது
-
நடப்பதில் லேசான சிரமம்
-
சிறிய செயல்பாட்டிற்கே இமய மலை உச்சியை அடைந்தது போன்ற ஆயாசத்தை உண்டாக்குவது.
மேற்சொன்ன விஷயங்களை உங்களால் உணர முடிகிறதா? உடனடியாக உடல் எடையைக்
குறைப்பதற்கான முயற்சியை மேற்கொள்ளுங்கள். உடற்பருமன் ஏற்பட்டதற்கான அடிமூலத்தை அறிந்துகொண்டு மருத்துவம் மேற்கொள்வது நல்லது.
What’s your Reaction?
+1
+1
2
+1
+1
+1
+1
+1
